„Þetta var geggjað. Það hefur verið vesen fyrir mig að skora mörk, ég hef fengið ágætis færi en það er geggjað að skora og ég á að gera þetta miklu oftar," sagði markaskorarinn, Eiður Aron Sigurbjörnsson miðvörður Vals sem skoraði eina markið í 1-0 sigri á Rosenborg í fyrri leik liðanna í 1. umferð forkeppni Meistaradeildarinnar.
Lestu um leikinn: Valur 1 - 0 Rosenborg
„Þetta var eins og við bjuggumst við. Þeir voru miklu meira með boltann en síðan var bara spurning fyrir okkur að nýta sénsana sem við myndum fá og vera skynsamir á boltann og halda honum. Það gekk alveg eftir plani. Við vorum hrikalega solid varnarlega, alveg frá Tobias og Patrick niður í Anton í markinu. Við erum mjög sáttir," sagði Eiður Aron sem var ánægður með spilamennsku liðsins.
„Þetta var vil ég meina okkar lang besti leikur sérstaklega varnarlega. Þvílík liðsheild og topp frammistaða hjá öllum."
Í fremstu víglínu Rosenborg var Nicklas Bendtner fyrrum leikmaður Arsenal. Segja má að Eiður Aron og varnarmenn Vals hafi unnið baráttuna við Bendtner í leiknum í kvöld en Daninn var lítið að nenna þessum leik.
„Mér fannst það skemmtilegt og helvíti gaman. Þetta er þvílíkur leikmaður og ekki smá hávaxinn. Mikið um slagsmál, eitthvað sem ég elska að vera í. Hann er ekkert mikið í því að stinga sér bakvið vörnina. Hann vonar svolítið að boltinn detti bara fyrir sig og þegar það gerist er alltaf hætta. Það er undir okkur komið að loka almennilega á hann eins og við gerðum í dag."
Viðtalið í heild sinni má sjá í sjónvarpinu hér að ofan.
Athugasemdir