„Það er virkilega svekkjandi að hafa gefið þetta frá okkur snemma leiks og það verður að vera á mína ábyrgð," sagði Jóhannes Karl Guðjónsson, þjálfari ÍA, eftir 2-1 tap gegn Breiðabliki í Pepsi Max-deildinni í dag.
Lestu um leikinn: ÍA 1 - 2 Breiðablik
„Við fórum í fjögurra manna varnarlínu. Ég legg leikinn upp rangt og við fáum það í andlitið snemma leiks. Því miður töpuðum við leiknum þá."
„Í fyrri hálfleiknum voru Blikarnir með leikinn. Mér fannst við vera alltof opnir og Blikarnir hefðu getað refsað okkur meira. Við þurftum að breyta til, til að loka á sóknir þeirra. Í seinni hálfleik náum við ágætis tökum á leiknum og við fengum færi til að jafna leikinn. Á móti svona góðu liði var það of mikið að gefa þeim þetta forskot svona snemma."
ÍA hefur ekki gengið vel að undanförnu. Er komið eitthvað stress í hópinn?
„Nei, alls ekki. Deildin spilast þannig að hún er virkilega jöfn. Við erum ekki sáttir með stigasöfnunina upp á síðkastið, en það er ekki eitthvað sem við getum breytt núna. Við settum okkur markmið að vera í efri hlutanum á deildinni," sagði Jói Kalli, en ÍA er í sjötta sæti með 22 stig.
Athugasemdir