Það var athyglisverður leikur á Hlíðarenda í kvöld þegar Valur tók á móti FH í Pepsi Max-deildinni.

Staðan var markalaus eftir frekar jafnan fyrri hálfleik, en eftir fimm mínútur í seinni hálfleiknum fengu gestirnir úr Hafnarfirði vítaspyrnu. Steven Lennon féll eftir viðskipti sín við Hannes í marki Vals. Lennon fór sjálfur á punktinn og skoraði.

Næstu mínúturnar voru skrautlegar því Valur fékk tvær vítaspyrnur og skoraði Patrick Pedersen úr þeim báðum. Í fyrri dómnum féll Andri Adolphsson um Þórð Þorstein Þórðarson og í seinni dómnum féll Andri aftur, í þetta skiptið eftir að Daði, markvörður FH, reyndi að kýla boltann frá marki sínu.

FH jafnaði metin á ný á 75. mínútu. Morten Beck skallaði í slána eftir hornspyrnu og fylgdi Björn Daníel því á eftir og kom boltanum í netið.

Þetta var ekki það síðasta frá FH-ingum. Þeir skoruðu aftur á 83. mínútu og tryggðu sér sigurinn. Morten Beck skoraði, hans fyrsta mark fyrir FH.

Valsarar voru ekki sáttir með sigurmarkið. Þeir töldu að brotið hefði verið á Hannesi í aðdragandanum, en ekkert var dæmt. Lokatölur 3-2 fyrir FH.

Deildin er svo jöfn og er FH núna komið upp í þriðja sæti með 25 stig. Valur er í sjötta sæti með 23 stig.

Sjá einnig:
Pepsi Max-deildin: HK vann toppliðið - Rosalegur leikur fyrir norðan