„Þetta var ljótur leikur að okkar hálfu en við tökum sigrinum og við komum hingað til að vinna fótboltaleik og við gerðum nóg til þess," sagði Dean Martin þjálfari Selfoss eftir 1-2 sigur á Þór á Akureyri.
Lestu um leikinn: Þór 1 - 2 Selfoss
„Við skorum tvö mörk en gáfum þeim ódýra aukaspyrnu rétt fyrir hálfleik og þeir skora. Við náðum ekki að tengja sendingar saman í seinni hálfleik en við vorum vel skipulagðir og náðum að klára þetta."
Selfyssingar gerðu taktíska breytingu eftir hálftíma leik.
„Þetta var ekki að ganga upp hjá okkur svo við ákváðum að breyta aðeins. Það er ekki gefins að menn sem byrja leikinn klári hann, stundum verður maður að breyta til, við ákváðum að gera það strax í staðin fyrir að bíða og fá mark á okkur."
Atli Rafn Guðbjartsson þurfti að fara af velli vegna höfuðmeiðsla, engar áhættur teknar þar.
„Eins og staðan er í dag tekur maður ekki áhættur með höfuðmeiðsli, Þórsarar misstu mann af velli með höfuðmeiðsli líka, þetta er hættulegt maður veit ekki hvernig þeir verða eftir nokkra klukkutíma."
Dean var gríðarlega ánægður með að næla í þrjú stig á erfiðum velli eftir langt ferðalag.
„Alltaf erfitt að koma hingað og að ná í þrjú stig er bara geggjað. Ég mun taka þessu alla daga, mér er alveg sama hversu ljótur leikurinn var, 3 stig eru 3 stig, stundum þartu að spila ljótt til að vinna og þetta er sætur sigur."
„Að keyra sex klukkutíma og gista. Þetta er nýtt fyrir suma leikmenn. Það er erfitt að spila á þessum velli, hann er laus í sér og ósléttur, ekki auðvelt en nóg að klára þetta."
Það er einn leikur eftir á tímabilinu en þegar Dean lítur yfir tímabilið er hann mjög ánægður með það.
„Við höfum lært mikið, leikmennirnir og ég sjálfur búinn að gera fullt af mistökum og læra af þeim. 2. deild er öðruvísi en 1. deild, það er ekkert gefins í fótbolta, sama í hvaða deild þú spilar þú verður að vinna fyrir stigunum. Við erum búnir að læra helling af þessu tímabili."
Athugasemdir