Real Madrid vann góðan 4-1 sigur á Real Mallorca í La Liga á Spáni í dag.

Gestirnir frá Mallorca tóku forystuna á 35. mínútu. Vedat Muriqi skallaði þá aukaspyrnu Lee Kang-In í netið.

Madrídingar áttu fimmtán skot í fyrri hálfleiknum en það stafaði ekki mikil hætt af þeim og þurfti frábært einstaklingsframtak Federico Valverde til að jafna leikinn. Úrúgvæinn fékk boltann fyrir aftan miðju, keyrði á milli tveggja leikmanna, áður en hann skar sig inn að teignum og þrumaði boltanum efst í vinstra hornið.

Eden Hazard byrjaði fyrsta leik sinn síðan í janúar en það kom lítið úr honum. Hazard fór af velli á 59. mínútu leiksins.

Antonio Sanchez fékk gullið tækifæri til að koma Mallorca yfir á 65. mínútu en klúðraði fyrir opnu marki. Eftir það settu Madrídingar í næsta gír.

Vinicius Junior kom heimamönnum yfir á 72. mínútu eftir sendingu frá Rodrygo og undir lok leiks kom Rodrygo liðinu í 3-1 er hann lék sér að varnarmönnum Mallorca áður en hann skoraði.

Antonio Rüdiger gulltryggði sigurinn með góðum skalla eftir aukaspyrnu frá Toni Kroos og þar við sat. Lokatölur 4-1 og Real Madrid með fullt hús stiga á toppnum eftir fimm umferðir.