Samkvæmt heimildum Fótbolta.net æfði miðjumaðurinn Guðjón Pétur Lýðsson með Breiðabliki í gær.
Guðjón Pétur yfirgaf Íslandsmeistara Vals síðastliðinn fimmtudag.
Guðjón, sem er þrítugur, hefur leikið síðustu þrjú tímabil með Val og orðið Íslandsmeistari tvisvar sinnum með félaginu en hann gerði þrjú mörk í 16 leikjum á síðasta tímabili.
Í síðustu viku sagði Guðjón við Fótbolta.net að hann hefði rætt við fjögur lið. Hann hefur verið orðaður við Fylki en Breiðablik virðist líka vera inn í myndinni.
Guðjón hefur spilað fyrir félög á Íslandi á borð við Breiðablik, Hauka, Álftanes, Stjörnuna og svo lék hann einnig með Helsingborg í Svíþjóð.
Í heildina á Guðjón 271 leiki í deild- og bikar hér á landi og hefur hann gert 59 mörk í þeim.
Mál Guðjóns ættu að skýrast í vikunni.
Breiðablik hafnaði í öðru sæti Pepsi-deildarinnar síðastliðið sumar, tveimur stigum á eftir Val.
Athugasemdir