Norskir fjölmiðlar hafa tekið upp frásögn landsliðskonunnar Hólmfríðar Magnúsdóttur sem opinberaði í gær að hafa orðið fyrir stöðugu áreiti frá fyrrum þjálfara sínum hjá Avaldsnes í Noregi.
Umræddur maður sendi henni mjög óviðeigandi myndir og myndbönd af sjálfum sér. Eitt skiptið hrindi hann í hana á föstudegi og spurði hvað hún væri að gera.
„Eftir símtalið byrjar hann að senda hvort ég vilji hann og hann sé með hann beinstífan í sófanum, bara hvort ég gæti kíkt aðeins áður en ég fer. Ég svaraði ekki og hann hélt áfram að senda alla helgina en ég svaraði engu fyrr en á þriðjudagsmorgni rétt fyrir æfingu, og mætti svo með mikinn kvíða á æfingu. Ég þorði ekki að tjá mig við neinn í liðinu eða kringum liðið, hann hafði einhvern veginn stjórn á mér allan sólarhringinn og var ógeðslegur við mig á æfingum," er meðal þess sem kemur fram í frásögn Hólmfríðar sem kom upp á yfirborðið í tengslum við #metoo byltinguna.
Helge Gaard, stjórnarformaður Avaldsnes, segir við norska ríkisútvarpið að Hólmfríður hafi látið vita af hegðun þjálfarans og hann hafi í kjölfarið verið rekinn frá félaginu. Hólmfríður sýndi stjórnarmanni skilaboðin frá þjálfaranum.
Norska ríkisútvarpið leitaði eftir viðbrögðum frá þjálfaranum sjálfum en án árangurs. Eina svarið var frá lögfræðingi hans.
„Hann vill ekkert segja um orðróm og mun ekki tjá sig um þessar vangaveltur," sendi lögfræðingurinn í skilaboðum til NRK.
Athugasemdir