Chelsea tók á móti fallbaráttuliði Newcastle í síðasta leik dagsins í ensku úrvalsdeildinni og komst yfir með marki frá Pedro snemma leiks, eftir frábæra sendingu upp völlinn frá David Luiz.

Ciaran Clark jafnaði með skalla undir lok fyrri hálfleiks og voru gestirnir frá Newcastle betri á lokakaflanum. Leikmenn Chelsea uppskáru hresst baul frá stuðningsmönnum á leið til klefa.

Heimamenn mættu öflugri til leiks í síðari hálfleik og skoraði Willian glæsilegt mark eftir aðeins tólf mínútur.

Heimamenn sýndu mikla fagmennsku og mikinn þroska á lokakaflanum og lönduðu dýrmætum stigum.