Aron Bjarki er 33 ára gamall miðvörður sem gekk í raðir ÍA frá KR fyrir síðasta tímabil. Hann lék alls í 19 leikjum í deild og bikar með Skagamönnum og skoraði í þeim tvö mörk.

ÍA féll úr Bestu deildinni á síðustu leiktíð en í október síðastliðnum var hann spurður út í framtíð sína.

„Við höfum ekkert rætt þetta. Við erum bara búnir að vera að klára tímabilið og pæla í því. Þetta kemur bara allt í ljós og ég er eiginlega bara spenntur að fara í fríið og fara með krökkunum í sund og fylgja þeim í fótboltanum og geta eytt tíma með fjölskyldunni. Svo sjáum við bara til þegar við förum að ræða málin," sagði Aron.

Núna er ljóst að hann er á förum og verður fróðlegt að sjá hvar hann spilar á næstu leiktíð. Auk KR og ÍA, þá hefur Aron leikið með Völsungi hér á landi. Hann er uppalinn á Húsavík.

Í gær var það tilkynnt að enski varnarmaðurinn Alex Davey væri mættur aftur til ÍA.