Reynt er að gera allt sem hægt er til að hindra sýn inn á svæðið þegar íslenska liðið er í taktískum æfingum fyrir leikinn gegn Argentínu. Æfingarnar eru aðeins opnar fyrir fjölmiðla fyrstu fimmtán mínúturnar en á þeim tíma gerist fátt merkilegra en að leikmenn eru í upphitun og skokka í hringi.

Við hlið æfingavallarins eru blokkir sem eru það háar að hægt er að sjá inn á æfingasvæðið. Lögreglan gaf öllum íbúum blokkarinnar skipanir um að halda sig frá gluggum og svölum á meðan æfingarnar standa yfir og eru myndatökur bannaðar.

Jóhannes Ólafsson, einn reyndasti meðlimur landsliðsnefndar KSÍ og yfirlögregluþjónn í Vestmannaeyjum, sagði að það væru ekki allir íbúarnir að fara eftir skipunum því fólk með myndavél hefði sést á æfingu í gær. Enginn grunur er þó um að þarna hafi verið njósnarar frá argentínska landsliðinu.