„Frammistaðan heilt yfir góð, sérstaklega fyrri hálfleikur. Þá erum við að leysa hlutina vel, skorum eitt mark sem að... það er mjög erfitt að sjá þegar boltinn fer yfir línuna á Stjörnuvellinum greinilega, þegar Stjarnan á í hlut, en svona er þetta bara. En svo náum við ekki að spila okkur út úr pressunni í seinni hálfleik. Náum ekki að tengja inn á miðjuna og förum að sparka boltanum of mikið fram og einmitt þanngi fáum við á okkur fyrsta markið," sagði svekktur Kristján Guðmundsson, þjálfari Stjörnunnar eftir tap gegn Val.
Lestu um leikinn: Stjarnan 0 - 2 Valur
Stjarnan fer til Keflavíkur í næstu umferð.
„Við getum tekið margt jákvætt úr því sem við höfum verið að gera undanfarið í sumar. Töluvert breytt Keflavíkurlið frá því úr leiknum hér í markalausu jafntefli. Það verður bara mjög jafn leikur, það er ég alveg viss um."
Naya Regina Lipkens varði mark Stjörnunnar í kvöld, í fjarveru Chante Sherese Sandiford, sem er meidd.
„Hún er meidd og verður það í einhverjar vikur. Meiddist á kálfa á æfingu í gær og við ræddum við Víkinga og Lipkens, við þökkum Víkingum kærlega fyrir liðlegheitin þar og samvinnuna. Hún stóð sig hrikalega vel, ég er gríðarlega ánægður með hana. Chante er frá í allavega mánuð held ég."
Betsy Doon Hassett er á Ólympíuleikunum með landsliði Nýja Sjálands og var því ekki með Stjörnunni í kvöld. Kristján býst við að hún verði ekki með í næstu tveimur leikjum.
„Að við skyldum spila svona vel, sérstaklega fyrrihálfleikinn og hún var ekki með okkur í dag á móti toppliðinu. Hún er búin að spila gríðarlega vel í sumar, þannig það stundum sást ekki að hana vantaði en kannski vantaði hana einmitt í seinni hálfleik til að bera upp boltann á miðjunni," sagði Kristján að lokum.
Athugasemdir