Wolfsburg fór í úrslit í Meistaradeildinni í fyrra en þýsku meistararnir mæta í heimsókn á Þórsvöll klukkan 16:30 í dag. Meðal leikmanna Wolfsburg er íslenski landsliðsfyrirliðinn Sara Björk Gunnarsdóttir.

„Við höfum skoðað nokkra leiki með þeim og farið vel yfir þeirra upplegg bæði í opnum leik og föstum leikatriðum."

„Wolfsburg er ótrúlega vel mannað lið. Það eru landsliðsmenn í öllum stöðum úr frábærum landsliðum svo það verður mjög erfitt að stöðva þær í sínum aðgerðum."

„Við þurfum að spila okkar allra besta varnarleik bæði í opnum leik en ekki síður i föstum leikatriðum þar sem þær eru gífurlega sterkar. Síðan þurfum við að nýta okkur ákveðin svæði sóknarlega og reyna að halda aðeins í boltann þegar tækifæri er á. Auk þess að nýta föstu leikatriðin okkar og reyna að stýra hraðanum í leiknum."

Þór/KA tapaði 3-0 gegn Breiðabliki á laugardaginn og vonir liðsins um að verja Íslandsmeistaratitilinn fóru nánast út um gluggann þá. Donni segir að andinn í hópnum sé góður fyrir leikinn í kvöld.

„Stelpurnar hafa alltaf verið mjög spenntar fyrir þessu verkefni svo það þurfti ekkert sérstakar ráðstafanir til að lyfta upp andanum eftir hinn leikinn."

Donni vonast eftir góðum stuðningi í stúkunni í dag gegn ógnarsterku liði Wolfsburg.

„Við reiknum með mjög góðri mætingu á leikinn, ég hreinlega geri kröfu á Akureyringa og aðra að mæta á þennan leik. Þeir gerast ekki stærri leikirnir svo ég trúi ekki öðru en að við hreinlega fyllum stúkuna," sagði Donni að lokum.