Franck Ribery, franskur kantmaður FC Bayern, lenti í átökum við franska fréttamanninn Patrick Guillou eftir 3-2 tap Bayern gegn Borussia Dortmund á laugardaginn.
Þýskalandsmeistararnir eru búnir að staðfesta fregnirnar og segja að fundur hafi verið skipulagður til að ná fram sáttum.
Guillou og Ribery hafa þekkst í mörg ár, en sjónarvottur segir Ribery hafa ýtt og slegið til fréttamannsins.
„Franck Ribery hefur sagt okkur frá því að hann lenti í átökum við samlanda sinn Patrick Guillou, sem hann hefur þekkt vel í mörg ár," saði Hasan Salihamidzic, yfirmaður íþróttamála hjá Bayern, við Bild.
„Þeir hafa komist að samkomulagi um að leysa ágreininginn á lokuðum fundi."
Atvikið á að hafa átt sér stað eftir að Guillou ýjaði að því að Ribery hafi átt sökina á tveimur af mörkum Dortmund í leiknum.
Athugasemdir