Mynd: Getty Images

Mikael Egill hefur staðið sig vel með Spezia en félagið er aðeins einu sæti fyrir ofan fallbaráttuna og hefur því ákveðið að fjárfesta í nýjum leikmönnum í tilraun til að forða sér frá falli.

Þetta mun fækka tækifærum Mikaels á vellinum og eru stjórnendur Spezia að skoða að lána hann út svo hann fái mikilvægan spiltíma.

Samkvæmt ítölskum fjölmiðlum hafa Sparta Rotterdam og Roda JC frá Hollandi mikinn áhuga á Mikael. Rotterdam er í óvæntri Evrópubaráttu í efstu deild á meðan Roda er í umspilsbaráttu í næstefstu deild.

Hollensku félögin sýndu Mikael áhuga síðasta sumar en Spezia neitaði að lána miðjumanninn tvítuga út.

Þar að auki hafa ónefnd félög úr ítölsku B-deildinni áhuga á Mikael og gæti hann því fengið dýrmætar mínútur á seinni hluta tímabils, hvort sem það verður í Serie B eða Hollandi.

Mikael, sem verður 21 árs í mars, á tíu A-landsleiki að baki fyrir Ísland og hefur komið við sögu í ellefu Serie A leikjum það sem af er tímabils.