Mynd: Fótbolti.net - Hafliði Breiðfjörð

Það eru 28 leikmenn í hópi hjá Liverpool og eru sjö þeirra meiddir. Þá er Stefan Bajcetic ekki talinn með því hann er partur af unglingaliðinu, en hann hefur einnig verið að glíma við meiðsli.

Klopp svaraði spurningum á fréttamannafundi fyrir leik liðsins á morgun á útivelli gegn Brighton. 

„Ég býst ekki við að fá nýja leikmenn inn. Ástandið er eins og það er. Ég er ekki mikið að velta mér upp úr þessu nema bara þegar þið spyrjið mig. Ég er þjálfari liðsins og starf mitt snýst um að ná því besta sem ég get úr þeim leikmönnum sem ég hef," svaraði Klopp þegar hann var spurður út í væntanleg kaup í janúar.

„Ég er sáttur með byrjunarliðin sem ég tefli fram en þegar við förum að rótera á milli leikja þá er ekki mikið af auka valmöguleikum nema bara strákar úr ungllingaliðinu.

„Við getum ekki leyst öll vandamálin í glugganum. Í draumalandi gætum við bara keypt inn nýja leikmenn núna í janúar en ég býst ekki við að það gerist."

Gengi Liverpool hefur ekki verið nægilega gott á tímabilinu og er liðið óvænt í sjöunda sæti ensku úrvalsdeildarinnar, ellefu stigum eftir Manchester City.