Þróttur Vogum hafði betur gegn Ægi þegar liðin áttust við í B-deild Lengjubikarsins í dag.

Leikið var á Leiknissvæðinu í Breiðholti en það voru Þróttar sem byrjuðu leikinn betur.

Viktor Smári Segatta skoraði tvennu í fyrri hálfleiknum og Andri Már Hermannsson gerði þriðja markið áður en flautað var til hálfleiks. Staðan var 3-0 í hálfleik fyrir lærisveina Hermanns Hreiðarssonar í Þrótti.

Ægir, sem er úr Þorlákshöfn, minnkaði muninn þegar Arilíus Óskarsson skoraði en Sigurður Gísli Snorrason gerði svo út um leikinn fyrir Þrótt með marki beint úr aukaspyrnu.

Lokatölur 1-4 en Þróttur er í öðru sæti riðilsins með sex stig eftir tvo leiki og markatöluna 9:2. Ægir er á botninum án stiga eftir þrjá leiki.