West Ham voru erfiðir í horn að taka gegn Man Utd í dag og strax á níundu mínútu var mark ranglega tekið af þeim. Felipe Anderson skoraði þá gott mark sem var dæmt af vegna rangstöðu. Nokkuð sem búið er að sýna fram á að var rangur dómur.

Þess í stað voru það heimamenn sem komust yfir tíu mínútum síðar. Paul Pogba skoraði þá úr vítaspyrnu sem hafði verið dæmd þegar Robert Snodgrass braut á Juan Mata innan vítateigs.

Staðan 1-0 í hálfleik en gestirnir bitu frá sér í byrjun þess síðari og nú skoraði Felipe Anderson mark sem fékk að standa. Klaufaskapur Paul Pogba þýddi að Man Utd missti boltann sem endaði á marki Anderson.

Staðan orðin 1-1 og Man Utd búið að fá á sig 44 mörk á tímabilinu, nokkuð sem hefur ekki gerst síðan tímabilið 2001-2002 þegar þeir fengu á sig 45.

Þegar tíu mínútur voru eftir af leiknum hafði West Ham lagt mikla pressu á Man Utd og átt fínustu tilraunir og meðal annars varði David De Gea stórkostlega en Man Utd fékk aftur víti. Pogba fór aftur á punktinn og skoraði af öryggi. Staðan orðin 2-1 sem varð lokastaðan í leiknum.

Pogba hefur með þessu skorað 13 mörk á tímabilinu auk þess að leggja upp önnur níu mörk en þetta er besta tölfræði hans í deildarkeppni til þessa. Sjö af mörkunum komu úr vítaspyrnum.