Hægri bakvörðurinn Aaron Wan-Bissaka vill fara til Manchester United í sumar að sögn Sky Sports.
Wan-Bissaka hefur mikinn áhuga á því að skipta yfir á Old Trafford, en er ekki búinn að biðja um að vera seldur.
Talið er að Man Utd sé að undirbúa sitt annað tilboð í Wan-Bissaka eftir að fyrsta tilboði félagsins í hann var hafnað. Það tilboð hljóðaði upp á 40 milljónir punda, en Palace vill fá að minnsta kosti 50 milljónir punda.
Wan-Bissaka, sem er 21 árs, er samningsbundinn Crystal Palace til ársins 2022.
Ole Gunnar Solskjær vill fá nýjan hægri bakvörð í sumar. Antonio Valencia er farinn og eru kostirnir núna Ashley Young og Diogo Dalot.
Sky Sports á Ítalíu sagði fyrr í kvöld að Juventus væri að vinna í því að kaupa Paul Pogba frá Manchester United. Joao Cancelo, hægri bakvörður Juventus, gæti mögulega verið hluti af þeim félagaskiptum ef þau ganga í gegn.
Athugasemdir