Spænska úrvalsdeildin hefst á nýjan leik um helgina og spænsku meistararnir í Barcelona heimsækja Athletic Bilbao í fyrstu umferðinni á föstudagskvöld.
Það eru allar líkur á því að skærasta stjarna liðsins og fyrirliðinn sjálfur, Lionel Messi, muni ekki taka þátt í þeim leik.
Messi meiddist þegar hann mætti aftur til æfinga hjá Barcelona eftir að hafa tekið þátt í Copa America með argentíska landsliðinu.
„Kannski væri það bara betra ef hann væri enn þá í sumarfríi," sagði Ernesto Valverde, stjóri Barcelona, léttur.
„Maður vill hafa sína bestu menn inni á vellinum en eins og staðan er núna mun Messi ekki taka þátt gegn Bilbao á föstudag."
Messi skoraði 50 mörk í 51 leik með Barcelona á síðasta tímabili en tíunda tímabilið í röð er hann að skora yfir 40 mörk.
Athugasemdir
