Jurgen Klopp, knattspyrnustjóri Liverpool, segir að Phillippe Coutinho sé orðinn heill en vill ekkert gefa upp hvort að hann muni spila í leiknum gegn Sevilla í Meistaradeildinni í kvöld.

Coutinho, sem reyndi að komast frá félaginu til Barcelona í ágúst, kom ekkert við sögu hjá Liverpool í fyrstu fimm leikjum liðsins á tímabilinu sökum bakmeiðsla.

Þrátt fyrir að spila svo tvo leiki með brasilíska landsliðinu í landsleikjahléinu þá var hann ekki í leikmannahópi Liverpool um helgina gegn Manchester City. Hann hefur því misst af öllum sex leikjum Liverpool á tímabilinu.

Liverpool mætir Sevilla í kvöld en spænska liðið er taplaust á tímabilinu. Þeir hafa náð í sjö stig í fyrstu þremur leikjunum sínum í La Liga og fóru í gegnum Istanbul Basaksehir í forkeppni Meistaradeildarinnar.