Björn Daníel Sverrisson, leikmaður FH, er að vonum spenntur fyrir bikarúrslitaleiknum á morgun þar sem Hafnarfjarðarliðið mun mæta Víkingum.
Björn tekur undir orð fyrirliðans Davíðs Þórs Viðarssonar um að tímabilið hjá FH verði dæmt af þessum leik.
Björn tekur undir orð fyrirliðans Davíðs Þórs Viðarssonar um að tímabilið hjá FH verði dæmt af þessum leik.
„Annað hvort gerir þetta tímabilið mjög gott eða dregur það niður. Það er alltaf geggjað að spila bikarúrslit. Í svona leik þá skiptir engu máli hvar liðin eru í töflunni," segir Björn Daníel sem varð bikarmeistari með FH 2010.
„Fyrir mér er bikarúrslitaleikurinn einn skemmtilegasti leikur sem spilaður er á Íslandi. Ég man ekki hvernig tilfinningin var fyrir leikinn 2010 en hún var geggjuð eftir leikinn. Í fótbolta sækist maður eftir sigurtilfinningu."
FH vann KR 4-0 í mjög eftirminnilegum úrslitaleik.
„Þetta var ekki eitthvað sem maður bjóst við fyrir leikinn. Við spiluðum mjög vel og vorum vel undirbúnir."
FH er með meiri reynslu á stóra sviðinu en Víkingur. Hjálpar það á morgun?
„Ég ætla að vona það. Margir í liðinu hafa unnið Íslandsmeistarara- og bikarmeistaratitla. Það á að hjálpa okkur en Víkingur hefur marga leikmenn sem eru svangir í að vinna sinn fyrsta titil," segir Björn Daníel.
Athugasemdir