„Við bjuggumst klárlega við meiru af þessum strákum á þessum tímapunkti. Naby Keita hefur reyndar verið óheppinn með meiðsli. Hann byrjaði vel, datt út í svolítinn tíma og hefur átt erfitt með að koma til baka," sagði Sigursteinn Brynjólfsson á kop.is í viðtali í Miðjunni á Fótbolta.net í vikunni.

Jurgen Klopp hefur áður látið nýja leikmenn koma hægt og rólega inn í liðið hjá Liverpool.

„Ef við horfum á Fabinho þá er þetta ekkert nýtt hjá Klopp. Hann virðist taka þessa nýju leikmenn og láta þá sitja og horfa. Hann hefur verið með þá í frystikistunni og í akademískum kúrsum að læra hans leikstíl. Núna undanfarið hefur hann verið að koma inn af krafti," sagði Sigursteinn.

„Þetta er það sama og með Andy Robertson í fyrra. Oxlade-Chamberlain er líka það sama. Klopp virðist vera með meiri langtímasýn en við stuðningsmennirnir sem verður oft snemma óþreyjufullir."

Magnús Þór Jónsson á kop.is benti á að Klopp sé duglegur að skipta miðjumönnum út og inn til að passa upp á álagið hjá þeim.

„Það er eitthvað að ergja Henderson og hann hefur ekki spilað tvo leiki í viku í einhvern tíma. Fabinho og Wijnaldum verða örugglega djúpir á móti United. Það er ekki lítill leikur að stíga inn í," sagði Magnús.

Smelltu hér til að hlusta á Liverpool umræðu í Miðjunni