Miðjumaðurinn Emil Hallfreðsson spilaði allan leikinn fyrir Padova er liðið tapaði á útivelli í ítölsku C-deildinni í dag.
Padova heimsótti Matelica og lenti undir eftir 18 mínútur. Þremur mínútum síðar var staðan orðin 2-0.
Padova minnkaði muninn í byrjun seinni hálfleiks en stuttu síðar missti liðið mann af velli með rautt spjald. Það setti svo sannarlega strik í reikninginn.
Einum fleiri tókst Matelica að skora tvö mörk til viðbótar. Þar við sat og lokatölur 4-1.
Hinn 36 ára gamli Emil hefur spilað 22 leiki á tímabilinu og skorað tvö mörk fyrir Padova sem er á toppnum í sínum riðli í C-deildinni. Hann virðist vera í fantaformi og spurning hvort hann verði í landsliðshópnum sem verður tilkynntur í vikunni.
Athugasemdir