Cagliari fékk Juventus í heimsókn í fjórða leik dagsins í Serie A deildinni á Ítalíu.

Juventus þurfti nauðsynlega á sigri að halda í toppbaráttunni og liðið byrjaði leikinn af miklum krafi.

Cristiano Ronaldo var einn af þeim sem var mikið gagnrýndur í síðustu viku eftir að liðið féll úr leik gegn Porto í Meistaradeild Evrópu. Hann svaraði ágætlega fyrir sig í dag.

Þegar 32. mínútur voru á klukkunni var Portúgalinn magnaði búinn að gera fullkomna þrennu. Fyrsta markið kom með skalla, mark númer tvö kom með hægri fæti úr vítaspyrnu og það þriðja með vinstri fæti.

Giovanni Simeone tókst að laga stöðuna fyrir heimamenn í síðari hálfleiknum en lengra komst Cagliari ekki. Juventus er nú í þriðja sæti deildarinnar, tíu stigum á eftir toppliði Inter en á þó leik til góða.

Cagliari er í mikillri fallbaráttu en liðið er tveimur stigum frá fallsæti.