Stuttgart og Hoffenheim áttust við í síðasta leik dagsins í þýsku úrvalsdeildinni.

Bæði lið eru um miðja deild og því var um miðjuhnoðsleik að ræða ef svo mætti að orði komast.

Heimamenn í Stuttgart reyndust sterkari í dag. Þeir komust yfir eftir fimmtán mínútna leik en þá varð Kasim Nuhu fyrir því óláni að skora sjálfsmark.

Staðan var 1-0 í hálfleik og bættu heimamenn við einu marki í seinni hálfleiknum. Sasa Kalajdzic gerði það og því þrjú stig í pokann góða hjá Stuttgart staðreynd.

Liðið er nú í áttunda sæti deildarinnar en Hoffenheim í því ellefta.