Wigan og Norwich skildu jöfn í eina leik dagsins í Championship deildinni. Leikurinn var mikilvægur fyrir bæði lið þar sem Wigan er í bullandi fallbaráttu og Norwich í toppbaráttu.

Wigan átti góðan fyrri hálfleik og verðskuldaði að leiða 1-0 eftir að Reece James skoraði úr vítaspyrnu rétt fyrir leikhlé.

Norwich tók stjórn á leiknum í síðari hálfleik og fékk urmul færa en tókst ekki að skora fyrr en undir lokin, þegar Teemu Pukki skoraði sitt 27. mark á tímabilinu. Finnski sóknarmaðurinn er markahæstur í deildinni og er einnig kominn með 10 stoðsendingar.

Fleiri mörkum var ekki bætt við og niðurstaðan 1-1 jafntefli. Norwich er með fjögurra stiga forystu á toppi deildarinnar og er Wigan tveimur stigum frá fallsæti.