Englandsmeistarar Manchester City eru komnir aftur á topp ensku úrvalsdeildarinnar eftir sigur gegn Crystal Palace. Man City stjórnaði leiknum en náði þó ekki að gera út um hann fyrr en undir lokin.

Raheem Sterling gerði bæði mörk City, það fyrra eftir glæsilega stungusendingu frá Kevin De Bruyne og það seinna eftir fasta og lága fyrirgjöf frá Leroy Sane.

Luka Milivojevic minnkaði muninn beint úr aukaspyrnu þar sem hann skaut boltanum lágt og fast í markhornið.

Sergio Agüero leit út fyrir að vera meiddur þegar honum var skipt af velli fyrir Gabriel Jesus á lokakaflanum en það var einmitt brasilíski framherjinn sem innsiglaði sigurinn á lokamínútunum.

Kevin De Bruyne lagði upp tvö af þremur mörkum City en þetta eru fyrstu mörkin sem hann leggur upp á úrvalsdeildartímabilinu.

Man City er með eins stigs forystu á Liverpool, sem tekur á móti Chelsea í stórleik helgarinnar.

City á erfitt leikjaplan framundan. Tveir næstu leikir eru gegn Tottenham á heimavelli og svo kemur heimsókn á Old Trafford.