Davide Lippi, umboðsmaður ítalska leikmannsins Leonardo Spinazzola, segir að endurhæfingin hjá leikmanninum gangi vel.
Spinazzola var frábær í vinstri bakverðinum hjá Ítalíu á EM í sumar en margt stefndi í það að hann yrði valinn besti leikmaður mótsins framan af.
Þessi leikmaður Roma sleit hins vegar hásin í leik gegn Belgíu í útsláttarkeppninni og hefur verið frá keppni síðan. Hann var á hækjum þegar Ítalía lyfti titlinum eftir sigur á Englandi í vítaspyrnukeppni.
Emerson Palmieri hefur leyst stöðu vinstri bakvarðar hjá ítalska landsliðinu í kjölfarið en liðið er að berjast um að komast á HM í Katar á næsta ári.
„Hann er ljón. Hann hefur lagt mikið á sig í endurhæfingunni síðustu 3-4 mánuði," sagði Lippi.
„Þú mátt ekki drífa þig alltof mikið, þú verður að vera skynsamur. Ef hann fengið að ráða, þá myndi hann spila strax á morgun."
„Endurhæfingin gengur mjög vel og við munum taka stöðuna aftur eftir mánuð. Það styttist í hann," sagði umboðsmaður Spinazzola að lokum.
Athugasemdir