Jesse Lingard gæti yfirgefið Manchester United í janúar glugganum næstkomandi samkvæmt heimildum frá Bretlandseyjum.
Þessi 28 ára gamli leikmaður hefur lítið fengið að spila á þessari leiktíð en hann stóð sig frábærlega á láni hjá West Ham á síðustu leiktíð og hjálpaði liðinu að ná Evrópusæti.
United vildi fá 25 milljónir punda fyrir Lingard í sumar frá West Ham en Lundúnarliðið var einungis tilbúið til að borga 18.
Núna gæti hins vegar United selt leikmanninn á 10 milljónir punda í þar næsta mánuði.
Lingard skoraði níu mörk í 16 leikjum fyrir Hamranna á síðustu leiktíð en hann lék hjá þeim á síðari hluta tímabils.
Lingard hefur átt nokkrar góðar innkomur í leikjum United í vetur. Hann tryggði liðinu sigur með góðu marki gegn einmitt West Ham fyrr í vetur og þá lagði hann upp sigurmark Ronaldo í uppbótartíma gegn Villareal í Meistaradeild Evrópu.
Þrátt fyrir þetta framlag þá hefur Ole Gunnar Solskjær, stjóri Man Utd, ekki gefið Lingard fleiri sénsa og nú gæti hann verið á förum endanlega.
Athugasemdir