Willum Þór Willumsson
Willum Þór Willumsson snéri aftur í lið Birmingham í 2-0 sigri á Bristol Rovers í ensku C-deildinni í dag.
Blikinn missti af síðustu tveimur leikjum liðsins vegna veikinda en kom síðan beint inn í byrjunarliðið gegn Rovers og var greinilega endurnærður.
FotMob gefur honum 8 í einkunn en aðeins einn leikmaður fékk hærri einkunn en hann í leiknum. Alfons Sampsted var ekki með vegna meiðsla.
Birmingham hefur verið á flugi undanfarið en sigurinn í dag var sá fjórði í röð. Liðið er í öðru sæti með 42 stig, stigi á eftir toppliði Wycome Wanderers.
Jón Daði Böðvarsson var ekki í hópnum hjá Wrexham sem gerði 2-2 jafntefli við Cambridge United. Wrexham er í þriðja sæti með 41 stig.
Mosfellingurinn Jason Daði Svanþórsson var í byrjunarliði Grimsby Town sem tapaði fyrir Crewe Alexandra, 2-0, í ensku D-deildinni. Grimsby er í 7. sæti með 31 stig.
Bakvörðurinn Atli Barkarson lék allan leikinn í 2-1 sigri Zulte-Waregem á Lommel.
Waregem skoraði dramatískt sigurmark undir lok leiks og endurheimti toppsætið en liðið er nú með 34 stig, tveimur stigum á undan RAAL La Louviere.
Athugasemdir
