Ari Freyr Skúlason lék allan leikinn er Lokeren tapaði fyrir Standard Liege í efstu deild í Belgíu fyrr í kvöld.
Ari og félagar lentu þremur mörkum undir í leiknum og náðu að klóra í bakkann með marki eftir hornspyrnu.
Ari tók hornspyrnuna og fékk skráða stoðsendingu á sig og er hægt að sjá markið hér fyrir neðan.
Lokeren er á botni deildarinnar þegar nokkrar umferðir eru eftir og þarf því að sigra næstu leiki sína til að forða sér frá falli.
Það eru þó skárri fréttir úr franska boltanum þar sem Bobby Allain tók byrjunarliðssæti Rúnars Alex Rúnarssonar á milli stanga Dijon fyrir nokkru.
Allain var í byrjunarliðinu er Dijon tapaði 2-0 fyrir Nimes og skrifast fyrsta markið einmitt á keppinaut Rúnars, sem var kominn of langt úr markinu þegar Teji Savanier ákvað að láta vaða úr miðjuboganum.
Rúnar missti sæti sitt í byrjunarliðinu eftir mistök og hefur Allain staðið sig vel síðan. Nú er aldrei að vita nema að hlutirnir breytist og okkar efnilegi markvörður fái aukinn spilatíma.
Talandi um efnilega markverði þá varði hinn 17 ára gamli Jökull Andrésson mark U23 liðs Reading í dag. Hann þykir gríðarlega öflugur en fékk tvö mörk á sig í 0-2 tapi.
Ísak Snær Þorvaldsson og Atli Barkarson voru þá í byrjunarliðinu hjá U23 liði Norwich sem tapaði 4-0 gegn Wolves.
Nimes 2 - 0 Dijon
St. Liege 3 - 1 Lokeren
Reading U23 0 - 2 Newcastle U23
Wolves U23 4 - 0 Norwich U23
Ari Freyr Skúlason spilaði allan tímann þegar lið hans Lokeren tapaði, 3-1, fyrir Standard Liege í belgísku úrvalsdeildinni í kvöld. Ari lagði upp eina mark Lokeren í leiknum. pic.twitter.com/CbdQjNKzrS
— Íslendingavaktin (@Islendingavakt) February 15, 2019
Athugasemdir