Spænski sóknarmaðurinn Alvaro Morata lék hlutverk er Atletico Madrid sló Liverpool óvænt úr leik í 16-liða úrslitum Meistaradeildarinnar.
Atletico vann fyrri leik liðanna heima 1-0 og þurfti að framlengja seinni leikinn á Anfield.
Liverpool leiddi 2-1 eftir mark Roberto Firmino í byrjun framlengingar en þá vöknuðu gestirnir frá Madríd til lífsins og skoruðu þrjú mörk. Morata gerði síðasta markið á 121. mínútu.
Eftir sigurinn grófu spænskir fjölmiðlar upp ummæli Morata frá því í nóvember þar sem hann talaði um að Atletico gæti slegið Liverpool úr leik í Meistaradeildinni. Þetta sagði Morata áður en liðin höfðu tryggt sér þátttöku í útsláttarkeppninni.
„Liverpool gæti mætt Atletico í útsláttarkeppninni og dottið út. Það er aldrei að vita í fótbolta, hvert einasta lið spilar eftir sínum eigin leikstíl og allt getur gerst," sagði Morata.
Athugasemdir