Diogo Jota gerði eina mark leiksins er Liverpool lagði Wolves að velli í eina leik dagsins í ensku úrvalsdeildinni.

Jota skoraði þar gegn sínum fyrrverandi liðsfélögum og tryggði Liverpool mikilvæg stig í Evrópubaráttunni.

Staðan var markalaus stærsta hluta fyrri hálfleiks þó Úlfarnir hafi viljað fá vítaspyrnu í upphafi leiks. Jota skoraði nokkrum sekúndum fyrir leikhlé eftir sendingu frá Sadio Mane.

Leikurinn var nokkuð jafn frá upphafi til enda og komust bæði lið nálægt því að bæta við marki en inn vildi boltinn ekki og urðu lokatölur 0-1. Annar deildarsigur Liverpool í síðustu átta leikjum.

Englandsmeistararnir eru í sjötta sæti eftir sigurinn, fimm stigum frá Chelsea í Meistaradeildarsæti.

Rui Patricio, markvörður Wolves, fékk höfuðhögg eftir árekstur við Conor Coady undir lokin og var borinn af velli. Patricio virtist liggja hreyfingarlaus í dágóðan tíma og hefur í það minnsta fengið heilahristing.