Heimild: mbl
Miklar áhyggjur af veðmálasvindlum í íslenska boltanum
Það verður alltaf auðveldara og auðveldara að veðja á leiki í íslenska boltanum. Í dag er hægt að veðja á leiki í nánast öllum deildum og jafnvel í öðrum flokki karla.
Í samtali við mbl.is segir Þorvaldur Árnason, FIFA dómari og dómari í Pepsi Max-deildinni, að það séu allir meðvitaðir um vandamálið.
„Það eru allir meðvitaðir um vandamálið sem fylgir þessu en það er samt erfitt að gera sér grein fyrir stærð þess. Vissulega hefur maður heyrt af svona hlutum og ég get svo sem alveg viðurkennt að maður hefur dæmt leiki þar sem óeðlilegir hlutir hafa átt sér stað en það er erfitt að festa hendur á því hvort um raunverulegt veðmálasvindl er að ræða," sagði Þorvaldur við mbl.is
Heimildir mbl herma að aðstoðardómarar í 2. flokki karla hafi veðjað á leiki þar sem þeir sjálfir hafi verið á línunni. Félögin sjá oft sjálf um að græja aðstoðardómara fyrir leiki hjá yngri flokkum.
Sá ekkert óeðlilegt í þessum leik
Það var nokkuð talað um það á Twitter í gær að það hefði verið lykt af veðmálasvindli í leik KM og Snæfells í 4. deild karla.
Mig grunar að Snæfell séu að fixa leiki í 4.deildinni. Einhver sem er á leiknum núna? #fotboltinet
— Guðmundur Auðun (@GummiAudun) June 14, 2019
Snæfell er eitt sterkasta lið 4. deildar á meðan KM er aðeins með þrjú stig eftir sigur á Afríku, sem er án stiga og með markatöluna 0:35. Snæfell komst í 5-0 í leiknum í gær, en fékk á sig þrjú mörk á stuttum kafla í seinni hálfleik og endaði leikurinn 5-3.
„Ég sá þennan leik að sjálfsögðu og persónulega sá ég ekkert óeðlilegt í honum. Við skorum fimm mörk í fyrri hálfleik og förum svo í ákveðnar skiptingar í hálfleik og seinni hálfleik, væntanlega til þess að hvíla menn, enda leikurinn nánast unninn," sagði Páll Margeir Sveinsson, formaður knatspyrnudeildar Snæfells, við mbl í dag, en mál KM og Snæfells er ekki komið inn á borð KSÍ.
Samkvæmt heimildum mbl þá gerði leikmaður Snæfells athugasemd við leik liðsins gegn KB í Mjólkurbikarnum fyrr á tímabilinu. Sá leikur fór 2-1 fyrir KB. Honum fannst eitthvað gruggugt í gangi hjá sínu liði, en KSÍ og dómari leiksins, Þorvaldur Árnason, komust að þeirri niðurstöðu að framkvæmd leiksins hefði verið eðlileg.
Þess má geta að varnarmaður Snæfells, Alfredas Skroblas, var dæmdur í heimalandi sínu, Litháen, fyrir veðmálasvindl. Hann fór í 12 mánaða bann fyrir það.
Klara Bjartmarz, framkvæmdastjóri KSÍ, sagði við mbl að KSÍ hefði miklar áhyggjur af stöðunni. „Því miður erum við ekki með mannskapinn eða tækin til þess að fylgja þessu almennilega eftir eins og staðan er í dag," sagði Klara jafnframt.
Athugasemdir