Leikmaður 21. umferðar í 2. deild karla að mati Ástríðunnar var Angantýr Máni Gautason, leikmaður Magna.

Angantýr skoraði bæði mörk liðsins í jafntefli á útivelli gegn meisturunum í Þrótti Vogum.

„Tvö mörk í Vogunum á móti Þrótti í alvöru partýi þar, aðeins eitt stig dugði að lyfta bikarnum en Angantýr lét þá vera með súrt bragð í munninum í bikarathöfninni, það er skellur að fá mark á sig á 89. mínútu og fara svo að lyfta bikarnum. Hann skorar tvö mörk og á helvíti góðan leik gegn besta liðinu í deildinni," sagði Sverrir Mar.

„Hann er búinn að eiga virkilega flott tímabil, kemur frá Dalvík/Reyni, hann er búinn að skora fjögur mörk og verið virkilega flottur."

Lokaumferð deildarinnar fer fram á laugardaginn. Magni leikur gegn Kára sem er í neðsta sæti deildarinnar en Magni er í 5. sæti og gæti í besta falli endað í 3. sæti og í versta falli 7. sæti.