Henry og Vieira voru samherjar í mögnuðu liði Arsenal sem vann meðal annars ensku úrvalsdeildina tímabilið 2003-2004 og gerðu gott betur en það en liðið fór þá taplaust í gegnum tímabilið.

Þeir voru magnaðir saman á Englandi en í kvöld mættust þeir á hliðarlínunni.

VIeira er þjálfari Nice á meðan Henry þjálfar Mónakó. Allan Saint-Maximim kom Nice yfir í leiknum áður en Ihsan Sacko fékk að líta rauða spjaldið í liði Nice.

Benoit Badiashile jafnaði leikinn fyrir Mónakó á 50. mínútu og þar við sat. Þeir skiptu því stigunum bróðurlega sín á milli.

Staða liðanna er ólík en Mónakó er í 19. sæti með 15 stig á meðan Nice er í 6. sæti með 30 stig.