Fabio Paratici, yfirmaður knattspyrnumála hjá Juventus, gefur lítið fyrir orðróminn sem segir Cristiano Ronaldo mögulega á förum aftur til Real Madrid í sumar.
Juventus keypti Ronaldo frá Madríd fyrir þremur árum en hefur ekki tekist að komast lengra en í 8-liða úrslit Meistaradeildarinnar síðan.
„Cristiano er framtíð Juventus, það leikur enginn vafi á því. Það eru forréttindi að hafa Cristiano hjá félaginu. Við kunnum að meta hann og erum mjög ánægðir með að hafa þennan meistara innanborðs," sagði Paratici við Sky á Ítalíu.
Zinedine Zidane, þjálfari Real Madrid, sagði í gær að orðrómurinn sem segir Ronaldo vera á leið aftur til Madríd gæti verið sannur.
Juve hefur unnið ítölsku deildina níu ár í röð en nú gætu meistararnir loksins misstigið sig í ljósi þess að Inter er með tíu stiga forystu. Ronaldo er sagður þrá endurkomu í spænska boltann, þar sem honum líður best.
Athugasemdir