Fyrsti sigur HK í Pepsi Max-deildinni er kominn í hús. HK-ingar fengu ÍBV í heimsókn í Kórinn í kvöld.

Leikurinn átti að fara fram í gær en var frestað vegna samgönguvandamála.

Fyrsta mark leiksins kom eftir 14 mínútur og var það Birkir Valur Jónsson sem skoraði það fyrir heimamenn. Hann vann hornspyrnur og skoraði síðan sjálfur út frá henni. Ásgeir Marteinsson átti hornspyrnu sem fór beint á kollinn á Birki.

ÍSLENSKI JACK GREALISH!!! https://t.co/H8a3uIh9AW

— Jón Dagur Þ. (@jondagur) May 16, 2019

Staðan 1-0 og ekki batnaði staðan fyrir Eyjamenn á 29. mínútu; hún versnaði til muna. Guðmundur Magnússon fékk þá að líta beint rautt spjald.

„Eyjamenn eru ALLT!! annað en sáttir með þessa niðurstöðu - BEINT RAUTT! Ólafur Örn er að kassa boltann niður þegar Gummi fer í hann. Þeir segja að hann hafi verið of hátt með sólann en ég verð að segja að þetta er ansi harður dómur og er langt því frá að vera sannfærður um réttmæti þessa spjalds, gult = já en rautt = alls ekki sannfærður," skrifaði Stefán Marteinn Ólafsson í beinni textalýsingu á Fótbolta.net.

HK skoraði sitt annað mark gegn tíu leikmönnum ÍBV rétt fyrir leikhlé. Þá breyttust hlutverkin frá fyrsta markinu. Birkir Valur lagði þá upp fyrir Ásgeir.

Í uppbótartíma fyrrihálfleiks kemur Birkir Valur boltanum á Ásgeir og seiðkarlinn lætur ekki bjóða sér það tvisvar og neglir honum í netið! 2-0 #liðfólksins #fotboltinet

— HK (@HK_Kopavogur) May 16, 2019

Seinni hálfleikurinn fyrir Eyjamenn sem náðu lítið að ógna. Gestirnir voru heppnir að HK skyldi ekki bæta fleiri mörkum við. Lokatölur í Kórnum 2-0 og fyrsti sigur HK staðreynd.

HK er í níunda sæti með fjögur stig. HK skilur ÍBV eftir á botninum. ÍBV er með eitt stig eftir fjóra leiki.

Það eru tveir aðrir leikir í gangi í Pepsi Max-deildinni. Fjórða umferðin klárast í kvöld.

Beinar textalýsingar:
19:15 Grindavík - KR
19:15 Fylkir - Valur