„VIð ætluðum okkur meira en þetta var ekki okkar dagur í dag," sagði Vigfús Arnar Jósefsson þjálfari Leiknis eftir tap liðsins gegn Þór í 16 liða úrslitum Mjólkurbikarsins í dag.
Lestu um leikinn: Þór 3 - 1 Leiknir R.
„Leikurinn var í fínu jafnvægi í fyrri hálfleik, helvítis óheppni að fá á sig þetta mark. Við náum ekki alvöru takti í seinni hálfleik, náðum reyndar að ýta aðeins á þá á þeim tíma sem við skorum markið en síðan kom þetta þriðja mark hjá Þór sem drap leikinn. Það er erfitt að vinna fótboltaleiki þegar þú færð á þig þrjú mörk í leik."
Liðin mætast aftur á Þórsvelli á laugardaginn en þá í Lengjudeildinni.
„Það er bara geggjað að það sé stutt í næsta leik, þá getum við hefnt fyrir tapið núna. Nú er það bara deildin aftur, fullur fókus á það, nú er bikarinn búinn og við setjum hann í ruslatunnuna," sagði Vigfús.
„Þetta var frábært tækifæri fyrir okkur að komast í 8 liða úrslit og hundfúlt að missa af því, við vorum búnir að sjá fyrir okkur að vera í átta liða úrslitum," sagði Vigfús að lokum.
