Fabrizio Romano greinir frá því að þýska félagið Bayer Leverkusen er að ganga frá kaupum á Granit Xhaka, þrítugum miðjumanni Arsenal.
Xhaka hefur spilað rétt tæpa 300 keppnisleiki á sjö árum hjá Arsenal og var um hríð fyrirliði félagsins.
Hann hefur verið gríðarlega mikilvægur hlekkur á miðju liðsins undanfarin misseri en virðist nú vera á förum frá félaginu.
Mikel Arteta hefur sagt í viðtölum að hann hafi miklar mætur á Xhaka og vilji halda honum, en stjórnendur félagsins virðast ekki vera á sama máli.
Romano greinir frá því að Leverkusen mun borga um 15 milljónir evra fyrir Xhaka og gefa honum fjögurra ára samning.
Xhaka á eitt ár eftir af samningi sínum við Arsenal, en í honum er ákvæði sem félagið getur virkjað til að framlengja samninginn um eitt ár til viðbótar.