„Þetta er allt saman hálf óraunverulegt. Ég vil ekki fara á flug í lýsingarnar en þið getið rétt ímyndað ykkur hvernig það er að verja víti frá besta leikmanni í heimi í fyrsta leik Íslands á Heimsmeistaramóti. Það er algjört rugl að þetta hafi gerst."

Hörður Björgvin Magnússon fékk vítaspyrnuna á sig. Mun Hörður stjana við Hannes næstu dagana eftir vörsluna?

„Þetta er það besta sem kom fyrir mig að hann klippti mig niður. Það er frekar að ég eigi að stjana við hann fyrst þetta fór svona," sagði Hannes léttur í bragði.

Hannes var valinn maður leiksins hjá FIFA og hann fékk verðlaun fyrir það. „Ég fékk bikar sem lookar smá eins og HM bikarinn. Ég tek hann heim og set hann upp á hillu ef við vinnum ekki sjálfan bikarinn."