Emil Hallfreðsson.
Heimir Hallgrímsson, landsliðsþjálfari hrósaði Emil Hallfreðssyni, fyrir frammistöðu sína eftir 1-1 jafntefli gegn Argentínu í dag. Emil var frábær á miðjunni og spilaði einn sinn besta landsleik frá upphafi.
„Ég var mjög stoltur af Emil Hallfreðssyni í dag. Hann spilaði 90 mínútur og gerði það vel. Hann spilaði ekki mikið með Udinese á tímabilinu en við gáfum honum tvo vináttuleiki áður en við mættum Argentínu og hann er að komast í betra leikform," sagði Heimir á fréttamannafundi eftir leik.
„Hann var frábær í dag. Hann var taktískt í réttum stöðum en hann var þreyttur í lokin eins og margir aðrir. Hann er kannski ekki jafn vanur því að verjast jafnmikið með Udinese og hann var í dag gegn Argentíu."
Sami ítalski blaðamaður og spurði út í Emil spurði Heimi einnig út í stuðninginn sem Ísland fær á Ítalíu.
„Ég veit af stuðningi okkar á Ítalíu. Það er gaman að svona stór knattspyrnuþjóð eins og Ítalía sýni okkur stuðning. Kannski er þetta af því að við spilum yfirleitt í bláu eins og Ítalía."
Athugasemdir
