Í dag eru nákvæmlega 15 ár síðan Cristiano Ronaldo spilaði sinn fyrsta leik með Manchester United í ensku úrvalsdeildinni. 18 ára Ronaldo kom þá inn á sem varamaður í 4-0 sigri á Bolton á Old Trafford.
Ronaldo spilaði á vinstri kantinum í leiknum en hægri bakvörður Bolton þar var Nicky Hunt sem var þá 19 ára gamall.
Í skemmtilegri grein Daily Mail í dag er ferill Ronaldo og Hunt borinn saman.
19 dögum eftir að Juventus keypti Ronaldo á tæpar 100 milljónir punda í sumar skipti hinn 34 ára gamli Hunt líka um félag. Hunt samdi við Crewe Alexandra í ensku D-deildinni eftir að hafa spilað með Notts County á síðasta tímabili.
Hunt lék á sínum tíma yfir 100 leiki með Bolton en staða hans hjá félaginu versnaði mikið eftir að Grétar Rafn Steinsson kom frá AZ Alkmaar árið 2008.
Í kjölfarið fór Hunt til Birmingham og Derby á láni áður en hann yfirgaf Bolton. Á meðan Ronaldo hefur slegið markamet og krækt í titla hefur Hunt flakkað í neðri deildunum á Englandi og spilað með Bristol City, Preston, Rotherham, Accrington Stanley, Mansfield, Leyton Orient, Notts County og nú síðast Crewe.
Smelltu hér til að lesa grein Daily Mail
Athugasemdir