Roy Keane verður þjálfandi fyrirliði goðsagnaliðs Manchester United sem mun mæta úrvalsliði Celtic og Írlands í góðgerðarleik í Cork þann 25. september.

Leikurinn er haldinn til minningar um Liam Miller, fyrrum leikmann Manchester United, sem lést snemma á þessu ári. Hann var aðeins 36 ára.

Miller lék fyrir Celtic áður en hann gekk í raðir United þar sem hann skoraði tvö mörk í 22 leikjum. Hann lék 21 landsleik fyrir Írland og vann Championship-deildina með Sunderland eftir að hann yfirgaf United.

Ryan Giggs, Rio Ferdinand, Paul Scholes og Gary Neville eru meðal manna sem munu taka fram skóna í leiknum en það var Sir Alex Ferguson sem fékk upphaflega hugmyndina að leiknum.

Martin O'Neill stýrir liði Celtic og Írlands en ágóði af leiknum rennur til Clare, ekkju Liam, og þriggja barna þeirra.