Elvar Geir Magnússon kíkti í heimsókn á Laugardalsvöll og ræddi við þrjá aðila sem starfa bak við tjöldin. Innslagið var spilað í útvarpsþættinum Fótbolti.net á X977 á laugardaginn.

Elvar ræddi við Frey Alexandersson sem hefur njósnað um andstæðinga Íslands, Dag Svein Dagbjartsson sem er kallaður Spielberg innan þjálfarateymisins og fjölmiðlafulltrúann Óskar Örn Guðbrandsson.

Freyr, sem einnig er þjálfari kvennalandsliðsins, hefur farið ófáar ferðirnar til að skila inn skýrslum um andstæðinga Íslands. Hann hefur kynnst ýmsu skrautlegu í ferðum sínum til Austur-Evrópu.

„Þetta hafa verið ansi skrautleg ferðalög og maður hefur verið að sótbölva ýmsum flugfélögum og hótelum. Þetta er langt frá því að vera glamúr-líf. En vinnan hefur verið gefandi, krefjandi og skemmtileg. Maður vill ekki klikka á einu einasta smáatri," segir Freyr.

Hann segir það mjög skemmtilegt að sjá vinnuna skila sér, eins og í 3-0 sigrinum gegn Tyrklandi þar sem mark Kára Árnasonar var greinilega teiknað upp.

„Það var ótrúlega gefandi að sjá vinnuna skila sér á vellinum, gegn Tyrklandi og líka gegn Úkraínu. Það er ólýsanlegt að sjá hlutina ganga svona upp. Þessir strákar í liðinu eru ótrúlega góðir að framkvæma hluti sem eru lagðir á borðið hjá þeim. Maður fékk sæluhroll. Þú talar um markið hjá Kára og svo var markið hjá Jóa Berg líka uppsett. Auðvitað þarftu hæfileika til að framkvæma þetta."

Freyr verður áfram í njósnastörfum fyrir HM í Rússlandi. Hann telur að það muni henta Íslandi að lenda í riðli með skipulögðum liðum.

„Ég hræðist að undirbúa leiki gegn Panama og þjóðum sem eru kannski villtari. En við finnum lausnir á þessu á endanum," segir Freyr en hægt er að heyra í honum, Degi og Óskari í spilaranum hér að ofan.