Matias Vecino kom Inter yfir eftir tæplega þriggja mínútna leik eftir undirbúning frá Lautaro Martínez. Fleiri mörk voru ekki skoruð í fyrri hálfleik og því Inter sem að leiddi þegar 45 mínútur voru liðnar.

Hollendingurinn Stefan de Vrij tvöfaldaði forystu Inter í byrjun síðari hálfleiks með skallamarki eftir sendingu frá Matteo Politano.

Tiemoue Bakayoko, lánsmaður frá Chelsea, minnkaði muninn á 57. mínútu þegar að hann skoraði sitt fyrsta mark í búningi AC Milan. Leikmaður sem að hefur fengið sinn skammt af gagnrýni en er þó búinn að spila vel undanfarið.

Inter Milan fékk vítaspyrnu á 67. mínútu. Lautaro Martinez fór á punktinn og skoraði örugglega framhjá Gianluigi Donnarumma.

Liðsmenn Milan voru ekki enn búnir að gefast upp en Mateo Musacchio minnkaði muninn á nýjan leik þegar hann skoraði af stuttu færi.

Nær komst AC Milan ekki og Inter fór því með sigur af hólmi, nokkuð óvænt. Fyrir leikinn hafði AC Milan unnið fimm leiki í röð á meðan Inter hefur verið í brasi.