Maður að nafni Anthony Burke hefur verið ákærður fyrir meinta kynþáttafordóma á leik Manchester City og Manchester United í desember á síðasta ári.
Lögreglan í Manchester sagði frá þessu í yfirlýsingu, en í henni kemur fram að Burke sé 41 árs gamall.
Strax eftir leikinn, sem Manchester United vann 2-1, sendi City frá sér tilkynningu út af myndbandi sem var í dreifingu á samfélagsmiðlum. Á myndbandinu virðist maður gera apahljóð í átt að leikmönnum United, en það eru merki um kynþáttafordóma.
„Félagið sýnir ekkert umburðarlyndi gagnvart mismunun af öllu tagi, og allir þeir sem gerast sekir um kynþáttafordóma verða settir í bann hjá félaginu til lífstíðar," sagði í tilkynningu Man City.
Burke mætir í dómsal þann 15. apríl næstkomandi.
Athugasemdir