FC Köln tók á móti Mainz í síðasta leik dagsins í þýska boltanum og úr varð spennandi slagur.

Mark Uth kom heimamönnum yfir snemma leiks með marki úr vítaspyrnu eftir klaufalegan varnarleik gestanna.

Köln leiddi í hálfleik en gestirnir vöknuðu ekki til lífsins fyrr en Florian Kainz skoraði annað mark heimamanna og staðan orðin 2-0.

Skömmu síðar kom Taiwo Awoniyi, sem er hjá Mainz að láni frá Liverpool, inn af bekknum og minnkaði muninn með laglegu marki.

Tíu mínútum síðar tókst Pierre Kunde Malong að jafna leikinn fyrir gestina með laglegu einstaklingsframtaki sem er hægt að sjá hér fyrir neðan.

Meira var ekki skorað og lokatölur urðu 2-2. Mainz er fjórum stigum frá fallsæti á meðan Köln siglir lygnan sjó, sex stigum þar fyrir ofan.

Leikurinn var sýndur beint á Viaplay.