Ramazan Kizil, forseti Dalkurd sem leikur í sænsku B-deildinni, heldur því fram að tyrkneska ríkisstjórnin hafi komið í veg fyrir styrktarsamning félagsins við kínverska tæknirisann Huawei.
Dalkurd var stofnað af Kúrdum í Svíþjóð, en sjálfstæði Kúrdistan hefur ekki verið samþykkt. Kúrdistan er svæði sem nær yfir part af Tyrklandi, Sýrlandi, Íran og Írak.
Kúrdar hafa verið í harðri sjálfstæðisbaráttu síðustu áratugi og hafa verið í stríði við Tyrkland í rúmlega 40 ár.
„Tyrkland vill ekki að við mætum tyrknesku liði í Evrópukeppni og munu ekki leyfa neinu stórfyrirtæki að styrkja okkur. Fyrir tveimur árum gaf Huawei okkur 40 þúsund dollara fyrir að auglýsa sig á treyjunum okkar en nokkrum mánuðum síðar fengum við símtal frá fyrirtækinu," segir Kizil.
„Í símtalinu sögðu þeir: 'peningurinn er ykkar. Við ræddum málin við Tyrkland og þeir hótuðu að loka á alla okkar starfsemi í landinu ef við höldum áfram að styrkja ykkur'.
„Tyrkland samþykkir ekki Kúrda og mun aldrei hjálpa okkur. Tyrkneska ríkið vill ekki að við komumst í Evrópukeppni því þar gætum við mætt tyrkneskum andstæðingum. Ríkisstjórnin mun gera allt í sínu valdi til að stöðva okkur."
Dalkurd er eitt af nokkrum sænskum félögum sem voru stofnuð af innflytjendum.
Assyriska og Syrianska eru þekktust og hafa bæði spilað í efstu deild.
Athugasemdir