Fyrrum landsliðsmaðurinn Arnór Smárason átti stórkostlega sendingu þegar Valur lagði Breiðablik að velli í Bestu deildinni í gærkvöld.
Lestu um leikinn: Valur 3 - 2 Breiðablik
„Gjörsamlega tufluð sending í gegn frá Arnóri á vinstri kantinum yfir á Orra Hrafn á hinum kantinum. Orri vinnur kapphlaupið við Davíð Ingvars, er sloppinn einn í gegn og klárar framhjá Antoni Ara með þrumu skoti,” skrifaði Sæbjörn Þór Steinke í beinni textalýsingu þegar stoðsendingin kom í öðru marki Vals.
Nánar var rætt um þessa mögnuðu sendingu í Innkastinu sem var tekið upp seint í gærkvöldi.
„Sverrir (bróðir Arnórs) er ekki hlutlaus hérna. Þetta er langbesta sending sem ég hef séð á Íslandi, bara frá uppafi,” sagði Baldvin Borgarsson, sem er aðstoðarþjálfari Ægis í 2. deild.
„Þetta er Ronaldinho bolti… hann þrumaði honum beint í hlaupalínuna, ótrúlega vel gert og frábær spyrnutækni. Þetta er fullkomin sending, besta sending sem ég hef séð á Íslandi.”
Sverrir Mar, sem er bróðir Arnórs, var skemmt. „Ég þurfti að klípa mig. Þetta var eitthvað annað góð sending.”
„Það þarf alltaf tvo í góða sendingu, það þarf þetta hlaup líka. Orri nær að vera á undan í boltann og gerir vel að klára þetta,” sagði Sæbjörn Þór Steinke.
Arnór er stundum kallaður „Smáradona” og sýndi þarna nákvæmlega af hverju svo er.
Leikurinn var sýndur á Stöð 2 Sport og það er hægt að sjá mörkin úr honum hér að neðan, en því miður sést ekki nægilega vel í sendinguna sem Arnór átti.
Athugasemdir